無稽

上星期，公司話幫四川災民籌款俾紅十字會，我地捐幾多，公司就捐幾多。
以最高效益計，我放棄o左媽媽提供的匯豐捐款攞積分方法，將我的捐款交o左俾公司。

今個星期一，返到公司，一早就話開全民大會，集福建、南京、北京、廈門等同事一齊tel con聽「老慒師奶MD (managing director)」講話。首先係公布各分公司籌得的款項，然後為災難默哀，繼而關心中國同事。原來公司亦有6位內地同事的屋企(倒塌或破裂) 和親人(輕傷) 受到影響，公司會給予佢地一個月有薪假，及即時發放恩恤金$5000。

之後「老慒師奶MD 」一語驚人︰「我地將公司的善款唔捐俾紅十字會，用尼分發俾尼6位同事，咪更加直接地振災！……捐俾紅十字會都係爭張tax deduction 的收據o者，相信各位同事都唔會介意……」

全埸同事面面相覷，我即時好激動地暗罵︰「你無病呀？果6位同事點受影響，都仲有工返，月月有糧出。你唔睇下人地d 孤兒，民工，一無所有，家園盡毀，屍橫遍野，連基本生活，環境衛生都成問題。捐$$，係想support 紅十字會o向醫療、生活等多方面幫助真正o向生死邊緣的災民。

仲有，d 捐款係每位同事對災民的一點心意，你唔可以打大旗號話為四川振災，事後將d $$ 當公司人情咁發放俾尼6位生命根本不受威脅的同事。要體恤，就唔該o向公司盤數撥出尼啦，幾萬蚊算得係咩呀？妳咁做與同災民搶食有何分別呀？

加上，o向尼個咁公開環境『提議』根本就無俾同事選擇的餘地，話唔好，好似我地唔關心同事咁；話好咩，sorry 我真係絕對講唔出口。」

好彩，最後由於反對聲眾 (當然包括高層)，人事部就send email 資詢每位捐款人的去向。

事後，「老慒師奶MD 」解釋話美國母公司已經捐o左二百萬美金俾災區，本地善款可望捐俾自己同事，尼個係母公司的意思。

阿老太婆呀，唔該妳喇，$$唔係話人地捐o左or 捐得多，我果筆就慳返o架下化？！就算係母公司的意思，妳的處理手法都好有問題喇！妳應該詢問同事的意願，或提供兩個捐款方向供我地自由選擇，而唔係先斬後奏，話點就點。私下變更善款用途係違法架！

最後最後，我地唔係在乎果張tax deduction收據, 而係我地真正想為災難出一分力！

唔該妳眼光迎放遠d，諗野諗得全面d啦！間公司跟住妳咁o既MD仲可以有咩作為……